Алесь Якімовіч - Байка пра казла — Беларуская Літаратура - кароткі змест/ Краткое содержание

Алесь Якімовіч - Байка пра казла

У бабулькі у Агаты
Жыў стары казёл рагаты,

Гэткі сівенькі,
Сівагрывенькі.

I разумны ж быў:
Сам ваду насіў,

Сам у печы паліў,
Сам і кашу варыў,
Бабу з дзедам карміў,

Барадой матаў –
Хату падмятаў.

Шмат казёл рабіў і шкоды –
Лазіў часта ў агароды,

Пасвіўся у полі –
У аўсе найболей.

А за полем быў лясок, –
Ён відаць казлу здалёк.

Вось казёл у лес ідзе:
– Што там смачнае расце?

Можа, у лесе густа
Вырасла капуста?

Ходзіць ён па ельніку,
Бродзіць па бярэзніку, –

Ні капусты, ні салаты
Не знаходзіць барадаты.

Раптам нехта штурх у бок:
– А, папаўся,галубок!

Я даўно цябе чакаю,
Ўсё на поле паглядаю...

Тупнуў наш казёл нагой:
– Хто ты, гэтакі герой?
Будзем дужацца з табой!

– Няма часу! – кажа воўк
I схапіў казла за бок.

– Бэ-э, – казёл тут забляяў
I, як сноп, на мох упаў...

Баба палку узяла
Ды пайшла шукаць казла.

Пахадзіла па палях,
Па балотах, па лугах,

Заглянула і ў лясок.
Бачыць: спіць пад елкай воўк.

– Гэй, – спытала у ваўка, –
Ці не бачыў казялка?

Прахапіўся сонны воўк:
– А які твой казялок?

– Козлік сівенькі,
Сівагрывенькі,

Барадаценькі
Ды рагаценькі...

Шэры воўк зарагатаў:
– Як жа, як жа – спатыкаў:

Ля дарогі
Бачыў рогі,

Ля маста –
Шматок хваста...

Баба ўголас: – О-ё-ёй!
А казельчык жа ты мой!

Хто ж цябе са свету збыў?
Каб яго пярун забіў!

Села баба на клапа,
Паехала да папа.

– Ах ты, бацюхна-папок,
Дам табе я піражок,

Што сама яго спякла:
Памяні майго казла,

Казла сівага,
Сівагрывага,

Барадатага
Ды рагатага!

– Ой ты, баба дурная,
Хто ж казлоў памінае?

Людзі рэжуць казлоў,
Як цялят ці бараноў,

З шкуры шыюць боты...
– Што ты, бацька, што ты?

Мой казёл не просты быў:
Па ваду ён сам хадзіў,

Сам у печы ён паліў,
Сам і кашу варыў,
Мяне з дзедам карміў,

Барадою матаў –
Хату падмятаў.

Дам яшчэ рубля. Прашу,
Памяні яго душу!

– Мала, баба, мала:
Прыбаў трохі сала.

Баба сала дала,
Памянуў поп казла.

 

Похожие статьи:

Алесь ЯкімовічАлесь Якімовіч - Смелы Васька

Алесь ЯкімовічАлесь Якімовіч - Чырвоная зорка

Алесь ЯкімовічАлесь Якімовіч - Цяжкая хвароба

Алесь ЯкімовічАлесь Якімовіч - Хітры воўк

Алесь ЯкімовічАлесь Якімовіч - Чарнавочка

БИОГРАФИИ
Паэт Беларусі
Пісьменнік Беларусі
Пісьменнік Беларусі
Пісьменнік Беларусі
Пісьменнік Беларусі